الشعر الفصيح | الشعر العامي | أدباء العرب | الشعر العالمي | الديوان الصوتي | ENGLISH

الأولى >> مصر >> سمير الأمير >> كل شعر شعر تاني لواحده

كل شعر شعر تاني لواحده

رقم القصيدة : 83959 نوع القصيدة : عامي ملف صوتي: لا يوجد


فى الزعيق والهيصه نشبه بعض

اللى سُنه بيفترى ع الفرض

فانتبه قبل الأوان ما يفوت

الكلام بيعيش ضمير الناس

والسكوت له فى المواسم صوت

والقلم شاهد عليك بالزور

القلم شاهد عليك بالحق

حرف ضلمه

وحرف يسطع نور

قلت أيوه

وليه ما قولتش لأ

قال فؤاد حداد وانا شاهد

اللى حق الزور بيستسلم

واللى حق الصدق بيجاهد

فيه كلام ع الصخر بيعلم

بس مهما الشُعرا تتكلم

الكلام عمره ما كان واحد

كل حرف اتقال شبع ترديد

مهما كان فى الشكل بيعاند

الضمان عهده على المضمون

يعنى لازم معنى تانى جديد

ينفخ الروح فى سكون الكون

ثورة الشُعرا على الأشعار

اللى كان ميه بيقلب نار

والى كان ع القمه وف مجده

والحكومه وراه وبتساعده

يكتب الغنوه بضمير تاجر

يعنى ما فهمشى البعيد الشعر

بس كان هوه الوحيد شاعر!!

كان محدد كل كلمه بسعر

فانتهى وسيرته انتهت بعده

كان دلع ميرى ماكانش بجد

خيبته ياعينى ماهيش على حد

واللى هان نفسه اكيد يتهان

كان صعيدى ولبسوه فستان

واحنا جينا فى الضلام واضحين

قلنا بنبشر صحيح الدين

كل شعر ده شعر تانى اكيد

له فى قلب الناس براح العيد

القصايد تشبه الإنسان

تشبه الطوب لما تشبه بعض

بص واتأمل وشوف حواليك

كل شعر, شعر تانى لوحده

زى لون شعرك ونن عنيك



القصيدة السابقة (إحنا مش بقر البرارى) | القصيدة التالية (اه يا شطوط التوت )



واقرأ لنفس الشاعر
  • تقدر؟
  • الفيلسوف
  • إحنا مش بقر البرارى
  • ولا ترتوى
  • ردح شعبي من تراث القهر
  • المصرى كان فصيح
  • شبابيك عيونك
  • وصف مصر
  • ثلاث قصايد وست واحدة
  • عندِك كبريت ..اولّع
  • موقع أدب (adab.com)


    اقترح تعديلا على القصيدة
    اضف القصيدة إلى مفضلتك
    أرسل القصيدة إلى صديق
    نسخة مهيئة للطباعة

    بحث عن قصيدة أو شاعر في موسوعة الشعر العامي
    عرض لجميع الشعراء | للمساعدة
    احصاءات/ آخر القصائد | خدمات الموقع | قالوا عن الموقع | مفضلتي الخاصة

    شعراء بلدك؟ | أخبر صديقك | راسلنا

    فهد عافت بدر بن عبدالمحسن الحميدي الثقفي أحمد فؤاد نجم محمد بن راشد آل مكتوم  صلاح جاهين نايف صقر عمر الفرا جوزيف حرب معز بخيت ضيدان بن قضعان سعد الحريص محمد الأحمد السديري محمد ابن فطيس


    جميع الحقوق محفوظة لموقع "أدب" ، ويجب مراسلة الإدارة
    عند الرغبة في نشر اي نصوص أو معلومات من صفحات الموقع.
    Copyright ©2005, adab.com
    برمجة قهوة نت