-5- يا تراتيل الحزن .. شفت بعيوني عيوني كيف تتحول مزن شفت كيف أقوم ليلي بالقصيد وشفت كيف الشعر يتخطّى القوافي والوزن . -4- ويله الحسّاس، ليله خيل وأحزانه حوافر، تسحقة !! يكتب إن العمر نافر، كيف يهذب للمشيب وخيل حزنه تلحقه ؟ يكتب ان الجوع كافر، وانه اتورّط وحبّ، وللاسف هالشخص سافر، دون توديع وعناق . - كم يعذبه الفراق . - و كم يعذبه الفقر فوق الفراق . - وكم يعذبه انه الاكبر وسط اربع اناث فوق سوط الفقر والملح الفراق كم تعذبّه الثلاث . -3- يهرب من البرد يتحسس دفاك، وما دفاك. يهرب من الجوع، يتلقّى ضماك . يشرق لوجهك وتغرب. يدري انك منه تهرب، منه يهرب لك معاك. ! -2- المدافي .. وجهي الآخر، تعالي لا تخافي . لاحظي كيف الضلوع تذوب بصدور المدافي، وإتّرمـّد. لاحظي شوقي الخرافي، واذكريني كلما تطري المدافي. وقرّبي لي حيل منها، إنتي بك قلبك تجمّد .! -1- ليه يتوهـّـج رغم هذا الرماد !! ويرسل للقياك آخر جمر فيه .. وتطفئيه ؟!! كلما تطرين.. - وانتي دوم في باله - يشبّ ويحتفي. وانتي همك ينطفي. وكلما تطرين.. - وانتي دوم في باله - يسبّ ويكتفي. لين ليله يختفي -0- يا تراتيل الحزن شفت بعيوني السكير المتّـزن شفت كيف يروح ليله سبّ، تهديد، ووعيد. وشفت بعيوني عيوني كيف تتحوّل مزن