تصوير رائع بس خانتك الثقه يا بن الحلال بغيت تضحك واضحكوا بك لين بانت علّتك برهه بسيطه فوق مبسوط الفضا كب الجدال وأحذر تشيل البيض كله في مخابي سلّتك الموقف الغصاب يضمن لك وش افروق الرجال وأنته تبي تدمح خطا الزلّه وكبرت زلّتك كانك تدوّر للجواب اللى علي قدر السؤال أى والله إن كثرتك لو تكثر تشابه قلّتك الله يعزك يالكبار من المواقف والجبال محدن قدر في طولة شموخك ولا في ذلّتك ودك تقهوى بس وينك وين من صفر الدلال خلك على الشاى ابو وزه ماتجمّل دلّتك من كبر قلبك لو تدش البحر ما جاك أبتلال حتي المزون اللي على راسك مطر ما بلّتك ذكرتني في محمد الصحاف من باب الهبال لا جيت أبنسى طلتّه ذكرتني في طلتّك اخصالكم متشابه في حل والا فى ارتحال ليته بقى في حلته وانته بقيت بحلّتك الزيف يفنى والحقيقه باقيه طول الليال جمعت لك شلّة يابو شلّة وخسرت شلّتك الشمس فوقك والغصون الجرد مافيها ظلال والناس من كبر الهرابيد الكثيره ملّتك البدو قالوا من زمان الفال يتلاه العقال وأنته معقل والسنين العجف جات وتلّتك ماعاد باقي غير صّل الفرض وأذن يا بلال الناس سمرّتك علي حيد الرصيف وخلّتك