ـ1ـ آخرْ مَزْمُور بْصَفْحَاتِي كْتَبْتُو بْدَمْعَاتِي الْعطْشانِه عَ الْمَلْقَى.. مَرْهُونِه حْيَاتِي يَا عَلِي.. فكِّلِّي رْهَانِي ـ2ـ اشْتَقْتِلَّكْ.. نَاوِلْنِي إِيدَكْ لاقِينِي.. بَلْسِمْلِي جْرُوحِي وْضَوِّينِي بِلْيَالِي عِيدَكْ شَمْعَه، بْتِسْهَرْ مَعْهَا رُوحِي ـ3ـ كلّ الْـ قلتُو.. قلْتُو بْفَرْحَه زْرَعْتُو بْدَفْتَرْ عُمْري.. عُمْرْ حيَّكْت مْنِ حْرُوفُو طَرْحَه لبَّسْتَا لِمْرُوجْ الزَّهْرْ ـ4ـ نصْرَانِي.. وْنادِرْ غَنِّيلَكْ غِنِّيِّه، لَحْنَا مَعْرُوفْ غَنُّوها الْكلّ مْقَابيلَكْ دَقُّوا كِلْماتَا عَ دْفُوفْ عَ الزَّقْفِه، الْـ صَارِتْ تِحْكِيلَكْ كِيفْ طَارِتْ مِنْ بَيْن كْفُوفْ نَغْمِه، تَـ النَّغْمِه تْصَلِّيلَكْ وِبْمَعْبَدْ عِينَيْك تْطُوفْ ـ5ـ بْحِبُّنْ كلُّنْ، كلُّنْ، كلُّنْ.. يهُود، نْصَارَى، وْإِسْلامْ بْحبُّنْ كلُّنْ، كلُّنْ، كلُّنْ مَهْما تْفَرِّقْنَا الإِيَّامْ عَ مْطَلِّي مَرْسُومْ مْطَلُّنْ يَا عَلِي.. وْأَللّـه الرّسّامْ إِيمانِي.. خَلاّنِي جِلُّنْ وْإِتْكِي عَ مْزَامِيري وْنَامْ وْوَزِّعْ عَ النَّاسْ.. الأَحْلامْ