يالله بأمانك عن سواد النيّه يا كافل أرزاق العباد الحيّه أعوذ بك يالله من أهل الغيره و أهل الحسد فالساحه الشعبيّه و من الوجيه الباردات السوداء و من الجروح القاسيات النيّه و من الضياع و قول ( خالف تعرف ) و اللهث خلف الشهره الشعريّه و من الغرور اللي يصيب أبن آدم و من النتائج لا غدت عكسيّه و من الزمن و أحواله و نكباته الظاهره منها أو المخفيّه و من أنحلال اخلاق و الا مبداء و من ( الخلل ) فالبنيه التحتيّه حفظ الحقوق أصعب طموح الشاعر و أكبر دليل حقوقنا الفكريّه راحت و حنا واقفين نطالع نكتب و يأخذ غيرنا الملكيّه و انا القصيد أحزن عليه أحيان ٍ اليا ذكرت بحوره المنسيّه من هيبته عندي يجيني خيفه و ان جيت ابكتب ما تطيع يديّه الا اذا ثار الشعور الصادق شفت القصيد و قلت : يالله حيّه جيته و نصبته زعيم اللحظه و حطيت في راس الجبل ماريّه يا مرحبا يا أم العيون الخجلا يا نبض صدر المنطقه الشرقيّه تدرين و الا ؟ جيتي و الله جابك الله يبارك فالغلا و الجيّه لبيه يا شوقي و نقطة ضعفي يالحاله المسموعه المرئيّه عن حب غيرك ما سألت أيامي و القلب رافض و الضلوع معيّه شوفي محلك يا حصيلة عمري دامك وريثة قلبي الشرعيّه قومي فديتك و أدخلي في قلبي و أمشي على مهلك شوي شويّه عرش الغلا بأسمك و لك و الزبده: " بدري على غيرك يجي كرسيّه " نامي عليك الله و أمانه و أسمه تحتك حرير و فوق راسك فيّه تخيلي لو للمحبه ديره عن كل عدوان الهوى محميّه رحنا ثلاثتنا و سكنا فيها انتي و انا و أحلامنا الورديّه يا ريف روحي يا حدايق بابل يالغيم يالمجموعه الشمسيّه حبك بعد ما مر داخل صدري صارت ضلوعي بالذهب مطليّه و القلب دايم نبضته مسموعه و اليوم قلبي نبضته مقريّه عيدك بقلبي يا مظاهر عيدي خوذي مشاعر خافقي عيديّه اليا مشيتي قلت لك في سري الله يعينك يالكره الارضيّه و اليا تكلمتي تصير أنفاسك مع حلو صوتك كنها خلفيّه حلوه رقيقه ناعمه غياره ترفه كريمه طاهره عفويّه كلك على بعضك كذا تركيبه ربي خلقها و أصبحت شخصيّه أجيك و أمشي و أن مشيت أرجع لك مدمن و حبك خلطته سريّه و ان جيت و ابواب الغلا مقفوله وقفت عند عيونها السحريّه مع كل باب أشعر بأنك خلفه أحاول أجعل وقفتي جديّه يا دولة العشق الفريد الأصلي جيتك و انا مابي سوى الجنسيّه فأن عذربوا فيني ضعاف الحيله قولي لهم ليت الاوادم زيّه شاعرو يكتب في جروحه و اصبح له في حياتي مطلق الحريّه فجأة طلع و أصبح بصدقه فجأة سوبر ستار الساحه الشعبيه !