.. ولو تسمح -بعد روحي- تقـرّب لي يديك ، شويّ ؟ بيمناي : السلام / ختام .. ولو يسراي تنهاني أبرحل ، يا عُمر زاهي .. زرع بي : وردتين ، وفَيّ ولا أدري إذا لي دون ما اشوفك : عُمر ثاني ! .. بياخذني طريقٍ ، حالف ايطفّي شعاع الضيّ يرمّدني ، وأنا شمسك ، تصوّر حجم خسراني ! يرجّعني -بدونك- ذايبة بتْـراب همّي .. زيّ : ” بقايا هيكل “ يلمّح بإنّـه كان : إنساني .. .. وإنت اللي نفض ضعفي ، ولا طمّن خفوقي شيّ ؟ مثل : كفّـك .. تفتِّـح في وجيـه النور : بيبـاني وإنت اللي رهَن أصدق معاني العاطفة : بيـدَيّ وعلّمني : ” ألف بـاء العشق “ فيها ، وقـرّاني .. وانا اللي ما ركبت الا على موج الحزن ، والغيّ وتهت ، ولا رسيت الا على ” قلبك “ ، وداراني وجيت اطوي مسافاتي ، نسيت اني ورا هالطيّ بيطويني الزمان أصلًا .. ويدفنّي .. وينساني .. لذلك ؟ -لـوّك تحبْـني- طلبتك : لا تطيع ، وعيّ ولا تْصافح يد النسيان ، ولو يغريك نسياني تذكّرني .. ” سحابة ، تمطر : احساس ، وقصيد ، ومَيّ وترحل ، بعد ما يزهر وراها : ألف بستاني “ .. وما دمنا على ” قيـد الوفـا “ ؟ باقي هوانا حيّ وباقي لك جنوني فيك ، واشعاري ، وأَيْـماني : وربّ اللي انكتب ما بيننا ، واللي ملكته فيّ ؟ ” أبيك بخير ، وآحبك “ : تذكّرهم -على شاني- ..