.. كتبلي في عتيم العمر ” أحبك “ ، وابتسم عمري وصارت دنيتي بيضا ، واحاسيسي ” فساتيني “ لبست من الهوى : أحمر ، لبست من الهَنا : زهري مَراياي : السّما .. والليل ؟ كحّل بالعشق عيني .. غفيت بْدعوتي : ” يبقى “ ، وصحّاني الوله بدري وكنّ الفجر : كمّل لي دُعاي ، وردّد آميني هلا يا مُنتهى امالي ، يَ أعذب حرف في سطري هلا : ” يَ اوّل دروب الحبّ ، ويا آخر عناويني “ .. تفضّلني .. تفضّل هالشّعور اللي سقى شِعري إلين ازهَر ” أمل وافراح “ ترقص في دواويني وهاتك ، كثر حرمان السّنين اللي كَلَت صبري وهاتك ، كثر ما يشرب غرامك ” من شراييني “ .. لو اشواقي تحت أمري ، لو الدنيا تحت أمري وربّ دْفـاك : لا اوصّل دروبك بالعشق ليني أنا اللي اموت لا ذوّب لقانا عطرك فْ عطري وإنت اللي تعيش اكثر : وكفّينك بكفّيني .. حبيبي ؛ دامنا بعنا الحسايف ، خلّنا نشري سنين اجمل ، تجمّعنا ، وكلمة : لا تخلّيني ولوّ تحب ” لحظات الغزل “ ما بيننا كثري ؟ تسكّر كل ” أبواب العتب “ ما بينك وبيني .. وخلْ بكرا يجي بكرا ، وحاضرنا ؟ على خُبري ربيع ، ولهفتك ؟ نسمة .. تعانق ورد خدّيني ولا أدري عن الماضي اليتيم ، ولا أبي أدري يكفّيني دريت انّ : ” الفرح توّه عرف ويني “ ..