باقي مثل ماتعرفيني قبل كمّ عام ان كنت باقي .. بذاكرتك ومخزونها ؟! توّبت عنك الخفوق وْلا اهتدى واستـقام يا اقدم محابيس روحي داخل سجونها والله انا كلّ ماعمري مشى للأمام ودي لو ارجع ورى لايام ممنونها ايام كانت على شاني تفيق وتـنام واضحك وانا في عيون الناس مجنونها وصلت معها الى ابعد نقطةٍ من هيام حتى اهلها باسمي احيانا يحرجونـها من علمتني شعور اني أعيش بسلام من لوّنت لي حياتٍ باهتٍ لونها من لاجلها عن كثير القلب كابر وشـام عيّـــآ يـأثّر عليه الا اسود عيـونها مبطي قبل مايصير الوضع ماهو تمام وتصير صعبه وهي سهله وياهونها قبل انهم يغرقوني في سيول الـملام وهي بزيف التهم حتى يغرقونهـا حطو عليها كلام وبالغو بالـكلام ياليتهم مثل ما اعْـرفها يعرفونـها قالو نهيناك .. ثم سالت دموع انهزام ماهزّهم يوم من عيني يسيحونها كيف اطعنتني يديهم في هذيك السهام ويديهم اكثر يدين بحاجه لعونـها منّي لها كل ماجاع الخفوق اهتمام جوعي لـ اسدّه .. بذكراها ولا اخونها وانها لتبقى بتاريخي عليّ الحرام بنتً رضى والديني حال من دونها