وش جابني؟ في كل مره قلبي يصيبه أحد وهالمرة قلبي اللي صابني وش جابني؟ جيت أسألك : مو لازم أعرف من متى تحبني؟ اللي يهم اللي متى بتحبني؟ إلى متى؟ أنا حبيبك لين هذا الصيف ولا للشتا يا خوفي من لون الذبول و يا ويلي أن فارقتني ليتك قبل ما جيتني أعتقتني أتصدق أن رغم فلسفتي وحبي للحياة لازلت أحسني صغير قدام عاطفتي وأخاف الذكريات أخاف أسوي شيء خاطئ ويحسب ذكريات وأخاف أحبك بالغلط وتحسب ذكريات وأخاف أني أنجرح وتحسب ذكريات وأنا مع الذكرى أموت وأحاول أعشق بالحكي ويضيع صوتي بالسكوت وأحكي ويخنقني البكي وللحين مدري شجابني أرتبت واجد بالزمان مدري الزمان أرتابني وحبيت أحضر بالغياب ونسوني والله كلهم وتصدق أني ما أنجرحت زمان خلوني وزعلت وبالعكس هالمرة فرحت أحسن لي تصدق بعد وصدقني والله أحسن لهم وحنا جيران الحياة حنا الفقارى الحالمين نكبر على يدين الظروف ونصغر إذا طق المطر نحتار وش نختار ما بين الموسيقى والرغيف ونعيش برا هالحياة قريب بس برا الحياة يا أهل الحياة شوفونا حنا مثلكم؟ من منكم وده مننا؟ ومن منا وده منكم؟ وحنا جيران الحياة يقطر من يدينا الوضوء وبحب نركض للصلاة نخطي ونضحك للضمير ويسامح ويضحك لنا ونعيش برا هالحياة يا أهل الحياة أن كان ناقصكم طهر تعالوا نعطيكم صبر الحزن فينا ينضحك وحنا جيران الحياة والشعر فينا للشعر صحيح أحيانا وسيلة رزق لكنه شعر يجي ما بين القلب والفكرة ودخان التتن يجي على دروب السفر وأحيان بالشاي الثقيل يجي جميل وحنا جيران الحياة حنا الصور اللي يتفنن بإلتقاطتنا مصوّر محترف عشان يفوز بجائزة عن صورة من حزن وسعَف حنا البراءة أطفالنا باللعب بالطين الشريف وحنا السنين المُثقلة من غصة العشق العفيف ينام ويانا الحزن مبسوط وحنا نلحفه ويعيش ويانا المرض يقطفنا ولا نقطفه وأن مات واحدنا يعيش وواحد ينام بشرشفه وملابسه تفرح كثير اللي بكوه تخيّل أن هذي الصور برا الحياة؟ وش جابني؟ لحياتكم؟ وأنا ولد جيرانكم اللي ولا مرة ذكرتونا بصحن ولا دخلتوا بيتنا ولا قعدتوا بيننا حنا كثير نشوفكم ونحبكم من طيبنا مرات ومرة نعوفكم من خوفكم أقسم بجيران الحياة اللي ولا مرة ذكرتوهم بشيء من الحياة واللي اذا فيكم كبر واحد توصونه يجنّب دربنا وإذا أكبرت فيكم بنيّة تعتلي عن حبّنا أني ما عاد أفكر أطمر سوركم ولا أطل من السطح لأني ما أملك سطح لأن مدري شجابني؟ ولأن مدري شصابني؟ في كل مرة قلبي يصيبه أحد وهالمرة قلبي صابني وتحبني؟ مو لازم أعرف من متى تحبني؟ اللي يهم أعرفني قبل تحبني أعرفني وبعده حبّني هذا المهم 25 نيسان 2016 ساحل الفحيحيل – الكويت