كنت أسأل دروب همي مـدري اسألني متى يـثـور الـبحـر من كـل وجـــداني والليـل مـثـل الـعــدو مــقـبـل يخاتـلـنـي حلال قـوم الـمواجــع كــل مـا جـانــي وان طـال صمـتي وانا صبري مجملني كم من سؤالٍ غـزى فكري من اشجاني لي صاحـبٍ في زمان الـوصل جاهـلـني من بـعـد هجـره أكيــد انه عـرف شــاني الهجـر هجـري لـمـن بالكـذب واصلـنـي واللي يـنال الجـفـاء منـي هـو الــجـاني واللي خـذلـــنـي اعـرفــه قــبـل يخـذلني ما خيَّـب الـظـن في فــعـلــه ولا اشقاني يشـبـه له الــلي تجـاهــلـني ولا أهـملني لو هو يجي بالـخـفـــا ماهــوب يخـفـاني وبالصدق ، وان مالقـيـت اللي يعاملني تساووا الـنــاس.. والـمبـعد كما الداني ياكثـرهم وان بغـيـت الــلي يـمـلـلـنـــي يا قـلّهــم والــفـؤاد إنــسـان وحـــداني يا صمتي الـلي تـزايد بـيــنــهم قـلـني لـلـدرب ، لأيـة بـشـــر.. إلاَّ لــخــلَّانـي مـحـتـاج لأنـسان ما عرفه ويجهــلـنـي واجلس معه وافـتــح الـوجدان واقراني ما يـهـمني كـيـف ، وإلا ويـن قابلـنـي يهـمـني يحـتـمـل صمـتـه عـلى شاني! ما يلومني ، ما يـقـاطعـني ويـسـألنـي والى انـتـهى دفـتـري يبعد ، وينساني !