ياخادم البيتين والخمس الاركان = يادرع باذن الله كساها حصانة مجدك لمس كف الكواكب والامزان = وخْطاه للتاريخ تمشي برزانة يا اعجاز حمله ما استطاعته الامتان = يا انجاز عقبة في بنى قيروانه يا اطهر سجل يخشى حسيب(ن) ورحمن = واحذر عمل يخشى الزلل والادانة يا ايسر من النسمة فالاصباح تزدان = واعسر من الضرغام في عنفوانه في سيرتك نفحات من زهر بستان = سوسن نفل نسرين وبْعيثرانة نرجس خزامى بيلسان(ن) وريحان = اوركيد كادي جوري(ن) واقحوانه لك وصف(ن) يشنف باغانيه الاذان = يصعب علي تفسيره وترجمانه كنّ الخليل اوجد لساحتك الاوزان = ما زانك الشعر اسمك الحر زانه اسمك لحاله جاه عرش(ن) وتيجان = يجتاح تدبير العدو واللعانة اسمك يقلد صدر الامجاد نيشان = يكسب قصيد المدح عزّ ومكانة ذكرك صداه ابلغ من اشعار ديوان = من شاعر تدرّس فصاحة لسانه بقْياس عبد القاهر بلاد جرجان = علامة القول البليغ وبيانه والفضل لو هو شخص من ضمن الاعيان = بيشير الى حضرة مقامك بنانه يا مبتدى ويا منتهى درب الاحسان = يا حصننا الثابت شديد المتانة لا دقّ ناقوس الخطر عند بلدان = والوقت قطّب بالغضب حاجبانه تلقى السعودي في صروح(ن) وعمران = هاني ومتهني في امنه وامانه والغير عايش بين مطرق وسندان = في وضع متلون يزيد احتقانه حزمك على بث الفتن قيد سجان = يا هيبة(ن) تبعث فالاحجار الانة تدفع على نيرانها مدّ طوفان = والباس بِاقدامك مروّض حصانه لك هيمنة في سالف الوقت والآن = لك في سنام المجد مركز وخانة يا نجدة المنكوب وانسه والاعوان = يا ابواب فرحه وانفراج امتحانه شعبك يقوده حب ما قاده اذعان = ما ترفع ايده لافتات انطحانه احكام شرعية وموروث جدّان = طاعة ورفعة عن فلول الخيانة ومواطنتنا حتّمت نصبح اخوان = لا عنصريّة لا انتقاص وإهانة حنّا عصا موسى وخاتم سليمان = بيدك وغى ثار وتصاعد دخانه حنّا زُمَر تفدي بالارواح الاوطان = رهن الإشارة حدّ رمح وسنانه لاجل الوطن هانت تفاصيل الاكفان = والدمّ نسكب حمرته وارجوانه والفكر الارهابي تناسته الازمان = دمّه سفك والعمر أُفقد ضمانه لاتْذكرك خاين يهوّن بخذلان = لاقاده الخبث الدني للعفانة دستور حكمك نهج سنة وقرآن = ويْدار باحكام الحدود المصانة خلّى السعودي واجهة عالي الشان = ف المحفل السامي وفي مهرجانه خلّاه شامخ يمتطي كلّ ميدان = والعزّ يتمنّى شرف إحتضانه المملكة متقلّدة عقد مرجان = في ظلّ راية من غمرنا حنانه دار العواصم من سكاكا لجيزان = الله رافع شانها جلّ شانه دار الحقوق اضعاف واميال واطنان = ومْقدّر الشعب وجزيل امتنانه أبعد أمل لو هو مغلف بكتمان = تحققه بالرفق واصلح بطانة في صورتك فوق الشواهيق برهان = إنّ الرضا دوّن أدق استبانة حلّيت فينا روح تسكن فالابدان = عينين تحرس ليلنا وتسهرانه وتْطيب دنيانا لو العالم احزان = ياللي على الغيمة ركز صولجانه يا قلب بهْموم المخاليق خفقان = نبض الغلا لك نسبته واقترانه مدرار خيرك ما يُقابل بنكران = جزل العطا ف الذاكرة اختزانه تبذل لدفع النهضة نفيس الاثمان = يا اكرم من الديمة ونيل الكنانة تنشد لك الصحة من اعماق وجدان = يالعافية تكفين عمّي مكانه منْك الوطن فزّت صحاريه غدران = كرّست له روحك وصنت الامانة حتّى سراب القايلة فاض هتان = والحنظلة اتحولت زعفرانة المستحيل اضحى بعهدك بالامكان = والكايد بعزمك ملاقي هوانه بعثاتك تخرّج مغذّين الاذهان = بفكر متنوّر مخلّد أوانه علم(ن) مبين النور في كلّ الاحيان = من حلّ والشمع اخمده شمعدانه بذورك بمحصولها مالت اغصان = والعلم قدره بالوجود وعنانه عبدالعزيز ارسى قواعد وسيسان = وسْلاحه ايمان وصلاح وفطانة فارس وباقدامه نسف كلّ بطلان = لاخر رمق ف الدهر رسّخ كيانه يا ربّ يا مومن مهيمن ومنان = تعفي عنه يامن بك الإستعانة واحفظ أبو متعب ومقرن وسلمان = كلّ(ن) بهرنا حكمته واتزانه وارحم فهد واغفر لنايف وسلطان = واللي ثرى العود ازدهر باندفانه