صباح الـ وحشني صوته و حنّيت ! غريب الصبح جاب الشمس و لا جابه ! بعد موتي بـ ليلة أمس ! حسبته مِيت حسبته مات بغيابي مثل مامت بغيابه حسبت الحزن اخذ له من عيونه بيت وكنت احسبني بقلبه و أني كلّ احبابه أظن انّي لوحدي بـ ليلتي عانيت و اظن اني الوحيد اللي بكى مابه اجمّع دمعي بكفي ، ابللني اذا جفّيت و اشرب منه ، مادامه منه باروى به كسر ظهر الهقاوي بصدّته، و ازريت اخبي الهم في عيني و اضم لصدري ثيابه ياكم مرّة عن غيابه أنا تغاضيت ! و مسحت بوجه قلبي شرهة غيابه ؟ و قلّلت الملام و عن جفاه اقفيت و سكّتّ الحكي لا ينطق عتابه واصبّرني ! بيرجع مثل ماتمنّيت أنا احزن بس لا يحزن ، أنا اولى به و ملّ الصّبر منّ صبري و لا ملّيت ادور له عذر واقبله و اشرح لي اسبابه وانا ادري مايقول : آسف عليك ابطيت ! أنا المبطي و انا اتأسّف له غيابه !! كثر ما اجتاحني شوقٍ وله حنّيت بكيت و مابكيت الّا قهر من صكّ ابوابه ! انا المجني عليه و منه انا جنّيت ! و كل ليله اضمّ الطيف و اغفى به غدر بي بعد ما - أقنعني و قصّيت .. .. جناحي ، ابتسم لي وطار بـ اسرابه ! بعد عشرة ليال لـ غيبته ! حسّيت عرفت انه تركني لْـ طيفه اسلى به ! قبل ما كنت اعاتب ! لا و لا شكّيت ! بـ يوم اضطر لـ عتابي و لا القى أيّة إجابه !! أنا اللي كنت اظن قلبه وطن وْ بيت ! و كنت احسبني اول و آخر أحبابه ! و لا ظنّيت ينفيني وطن عمري اذا عقّيت اثاريني نسيت احسب لـ بِرّي حسابه صباح الـ خير ! لـ اوجاعه انا غنّيت غيابه كان اجمل موت ، أحيا به سهرت الليل ما جابه ، أنا بـ أبِيت ! يجيبه حلِم ، لا صرت انا ويّاه نتشابه .