"ملعقة غيّاب " _____________________ وتفرعن الملح : بعيوني و سال الدمع " حيره " لـ زايرين بـ نجف بالي و ركن الشوق عرّاب شرّعت صدري لهم و الصمت عطْرته بسيره و مرّو مرور الكلام بداخلي و تتشكل : عتاب وقفت أفتش بـ عمر الذاكرة عن أيّ ديره تستوعب الراحل النسّاي من دايرة الأغراب لا الأرض لمت خُطاي و لا قدرت شبه الجزيرة تتحمل حروف وجهتها شجن و تدوّر " أعراب " يقرون صفحة مدى هالصبر في رحلة مصيره بين الأسارير و أطلال الظنون و حزن الأسراب للغايبين بـ شريط الوصل قبل أعرف كثيره : من خارج النص لا مشهد سوى إني عشت مرتاب ترّخني الضيَّ بأعمار نجوم و مات غيره : ليلٍ سهرته وحيد و في يدْي رزنامة أحباب راحو بلحظة سكون و ظلْت أوراقي أسيره في بيت حلمي و نامت كل هالدنيا ورى الباب شديت بيدي ظهر قلبي و عاندني ضميره فإحساس وقف على عتبة شفاي و طاح بكتاب ترجم طواري لـ أهاليها حنين و حق جيره من موطن الذكريات لـ صوت قال بـ وجه غرّاب ( عفت الديارُ ) ، ( قفا نبكى) ، ( أمِن ) ، (ودع هريرة ) غنيتهم . . بسِّ لي هالحين و الغيّاب : غيّاب مستوطنين البِعاد و هالمساحات : الكبيره في عالم الوهم و آثار الشعور البالغ . . أسباب اخرجت من جيب ذاكرتي سلام و قلت أثيره باصواتهم في ممرات العيون و نقع الاهداب اشعلت روحي بشتوية ملامحهم الاخيره لكن عرفت الدفى ماكان قد البرد طلّاب خلوني أعرف بإني سرِّ و المى خان : بيره وخلوني أدرك عطش ظلْي هلاك وحوله تراب " كذاب كل من يقول الشي لامن راح خيره الخيره إن جاك شي و علمك من راح كذاب " مشكلتي إني كثير و كانت أحلامي كثيره لين أختصرت الحياه و قلت مهما الجرح غلّاب مازال صبري بـ ( شباك ) الولْه مافيه غيره : وإن عادو الغايبين بـ شوق بفتح . . كل ( الأبواب ) . _____________________________________ " ناصر ستار "