آه يا حبيبي و يا حبيبي آه كله بيبكي الليل على ليلاه قالوا زمان في الشعر شعر كتير لكن ما قالوا اللي عيونك .. يا غزال قايلاه -------- ببكي على بنت العرب و النور سليلة من أصل و فروع و جدور مُهرة و بتشق الصحاري البور و بتبكي و تعدد : نقول الله ( دنيا غرورة يا زمان غدار بتاخدنا مـ الجنة لجوف النار ما ينطلق خيلٕ أصيل مـ الدار إلا و لسان الأعاجم بالسهام رشقاه كَحّلْ عيوني كتير من الشعرا غنيت لكل البشر .. من أغنيا و فُقرا و رسمت حرفي على جبين السما قمرة ولا عمر مرة الليل نصفني معاه بنت العرب و سليلة الفرسان وارثة الشجاعة و أشجع الشجعان حرفي أصيل و بينصف الغلبان ومهما باع و اشترى .. حروفي مش بايعاه ) صَدَقوا اللي قالوا في الزمن مواويل مليت أقول و اشتكي : يا قلبي ليه بتميل شارد بقلبي و فكري في زمن معلول بيشدني فاكتب ويسيبني اموت وياه ياللي كتبتوا الشعر دِلوني كيف ينطفي حرفي مع شجوني رغم إني شاعر و القصيد لوني ليه لما بكتب بلقى حرفي تاه ! شارع طويل و السفر ملهوش نهاية وحد كان نفسي أكتب غَزل لكني مالي حد نداهة بتشدني لطريق نهايته سد و الليل بيرسم خطاوي سِكتي وياه الصبح شقشق و انا لسه بقول يا عين ياليل يا عين و يا عيني على العاشقين قالوا زمان في الغُنا أهل الغرام مساكين والليل مازال مِسكين ولا السواد قساه ؟ وجع الدماغ ولا خِلو الجيب جِبت ليِّ 100 صاحب و ألف حبيب كله ابتعد عني و قال لي نصيب و نصيبي اعيش تايه يا خلق الله ! آه يا حبيبي و يا حبيبي آه .