نفسي الفدا يا كاس إنت اللي تسمعني بتردني مجبور ولا مرة توجعني جايلك ذليل و عليل ، من حزني إنتعني كل الأحبة مشوا مفضلش ليا سواك حتى اللي كُنت شاريه بـ ابخس تمن باعني تايهين يا كاس إحنا من مينا إلى مينا الموجة بتشدنا و الغربة تكوينا يوم ما التقينا البر تاهت مراسينا ورجعنا تاني حزانىٰ ما ندري إيه مكتوب لا عرفنا ايه جابنا ولا ايه مودينا وصلنا دار الحبيب، دقينا عـ الأبواب لما بِعدْنا اتفتح ، قربنا سدوا الباب نبشوا بضوافرهم سنوا كمان الانياب أكلوا قليبي ني ... حتى ما سموا عليه بالذمة يعني يا كاس يتسموا دول احباب ؟ ناقشين وعودهم على كف الفؤاد و اليد بيهادوا بعض ورود و انا قلبي زي الند طب هو يعني حرام لو قلبي نابه الود سايبيني وحدي أعاني من قلة المراسيل " كل القلوب اتنين و انا قلبي ماله حد " كُنت في ضلالهم هناك تايه أنا و سارح صبيت لهم مـ العذب ، سقوني مـ المالح أنا مَيتي تروي .. و البحر مش صالح و نقشتهم كُحلى تسحر لمن ينظر لكن عيونهم دايمًا رمشها طالح عَجِبت للي باعوني ثم جُم يبكوا هاتوا اللي في قلبكم.. قولوا كمان و احكوا كم شفتوا و انتوا بعيد عني عذاب ؟ ضحكوا .. ما شفنا بعدك هَنا ولا شفنا حنية ما انتوا اللي بعتوني و انا كنت ناصحكوا قوموا و روحوا هناك في أسفل السافلين دا اللي يخون مرة ... يبقى من الخاينين هيتوه في هذي الأرض عدد السنين و سنين يبحث عن الأجوبة في باطن الرسالات ما هيلقى مرة جواب لو حتى راح على فين كاسي إنقضى و القدر صب لي كاس تاني رجت أهاتي الفضا من كتر أحزاني نوح كمان يا حمام و ارجع و من تاني نوح على الغايبين و سابوني وحداني قول للي صابهم سهم القسوة يا مجانين مهما تروحوا لفين .. ما هتلقونيش تاني