جوا فـ جوف الليل .. طرابيزة فوق منها 4 كاسات فاضيين .. و ازازة ولا اتنين الضلمه كات اقوى من اني اشوف الناس .. واحد و كان باين من صوته انه حزين قال مرة واحدة و صاح .. : بكرة اللي هيدوملك نفسك متخسرهاش في معادلة الأيام كله يساوي الصفر اوعى تقول الحظ راح مرة يديني .. اوعى تراهنها .. لا تمتلك حاجه أصلًا لتخسرها و اوعاك تكون قلقان .. بكره انت هتفارق " زي اللي راحوا زمان " لن ترتوي بالحب يا أجهل الجاهلين كل البشر من طين و النور مهوش لينا ردوا عليه اتنين .. مـ العشمانين فـ الناس و العشمانين في النور دنيا علينا تدور و احنا اهو عايشين بينا القدر راضي و احنا كمان راضيين لو يوم أتاك الوجع .. من اقرب الغاليين حط الوجع في الكاس و اشرب عشان تنساه دا اللي يبيعك ليه تدمع عليه العين ؟! ربك مهوش غفلان عنك و عن غيرك هيطبب المجاريح و يخفف الآهه و يضمد الأرواح و هيقضي عـ التنهيد و يساند اللي الليل خدهم في حضنه و نام .. و التاني قال له خلاص .. - بعد اما وقع الكاس من ايده و اتكسر - على ايه بتتحسر ! يا عاشقين غنوا و املوا الليالي السود أفراح و حرية غنوا لكل الكون و العالم المجنون صدقني مهما يكون بكره هتتعدل سمعه اللي كان قاعد .. ساكت .. وحيد .. بائس و لإنه كان شاعر ردد بصوت هادي : الرب مبيديش إلا على كيفه و انا و اللي زيي كتير متنا خلاص مـ الخوف و ازاي ننام أمنين و ضهرنا مكشوف و لمين هنشكي .. لمين و احنا اللي مش واصلين حتى لطرف الخيط ابليس مكنش عبيط لما عرف قيمته رفض السجود لينا و كأنه كان عارف إنه هييجي اليوم و يعيش فـ وسطينا ريح الخطيئة مازال يخلق لنا آدم فرعون برغم الموت عايش في كل نظام بيخوف المسجون و بيرعب السجان و بيقتل اللي يقول عـ الرب إنه جبان ثم قام .. ** ثم قام مـ الزاوية واحد قال - و صد الموجودين - إن بعد العسر .. ضيقة دي الحقيقة اشبعوا من كل حاجه قبل ما تمشي و تفوت قالها قبل ما روحه تطلع قبل ما السكران يموت ..!