كاتب قصيدة و برتجف مـ الخوف أو مـ اللي شافه قلبي فـ الهاوية و انا تحت شُفت من البشر اتنين ماسكين كتاب الزمن و بيكتبوه بأنين واحد بيرسم حمام و التاني راسم سلاح و بشر كتير تايهين و ظهر هناك ابليس شاور عليهم قال : - شوف يا إلهي بعينك دول بني آدمين ؟ - - غشوا الحقايق و انا طيب ، خجول ، و أمين - و خرجت مـ الهاوية بعد الخروج ... جالي الشيطان بالليل و حكالي عن أسرار ... صُبْ لِّي كاس أول - كُل البشر واقفين بيحدوا في السكاكين صُبْ لِّي كاس تاني - ذَنْبَك بإنك نبي في معشر الكافرين صُبْ لِّي كاس تالت - آدم نبي بس انا كنت الطاووس قَبْلُه صُبْ لِّي كاس رابع - أنا ما غويت آدم لكنها حوا صُبْ لِّي كاس خامس - أوعى فـ يوم تُسجد إلا لرب الكون كاسك خلاص اتمَلى إشرب... - مانيش شارب ! وبدأنا نسرد في الكلام و نقول : أنا : لسه باقي فـ عمري كام مشوار تايه في ظلمة و ليلي ماله نهار ما تدلني يا صديق دا انا مليت و برغم إني بكيت .......... ربك حليم ستار النور مهوش قد الظلام فيا و الفرح أغنية و انا عودي لحنه حزين خبيت فـ قلبي الوجع و ضحكتلك مرغم و الحزن بيشدني مطرح ما اروح على فين تايه يا خلق الله تايه بلا مرسى خدني الهوى للبحر لكن بدون ما ارسى الذكرى جوايا تنهش فـ قلبي البكر لو تعرف النسيان علمني كيف انسى قرب عليا يا صديقي و شوف كيف يعمل الشوق للوطن و الذات قرب و دقق نظرتك فيا هتلاقي جوا فؤادي مـ الشاويش علامات قرب و بص على الوطن مني خبي عيونك جوا في النني لإن عينك هتبكي البصة دي بالذات الدنيا حرب وحربي بين اتنين قلبي اللي عاشق وطن و وطن ملان خاينين معرفش مين ينتصر أو مين بيخدع مين كل اللي كنت اعرفه إن الحروب عمرها ما كسبها يوم اتنين فـ ازاي أنا انتصر على دولة الزنازين ! و انا كل ما املك قلم و كتاب و قلب و دين ! و الدنيا حرب بس ايه بايدي ؟ أحمل سلاح و اقتل ولا اطير كحمام ؟ ازرع ورود المحبة و اغني للإنسان ولا أحاربهم و أنوح كما الغربان الدنيا دي يا صديق في الأصل كانت حب و احنا ابتدعنا الحرب و عشقنا تفاصيلها مين يا ترى مسؤول عن كل دم بلاش أنا بسأل القاتل ليه اختياره الحرب طب ليه بقى مغنّاش ؟ قرب عليا يا صديقي و شوف - شايف فؤادك م الهموم مكوي - شايف حروفك و الألف محني - دا لإن قائد كان سليط اليد - أمر بحبس اللي في يوم يحكي - لا تبتئس يا خِل مهما الوطن خانك .... طب شفت ايه مكتوب مكتوب على الجدران - - " كل الحمام هيطير لو نزلت الغربان أو بطلت تزعق كل الحمام هيطير لو كان على الأكتاف النسر مش حاكم لو قلت بس الوطن فيجوز هتتحاكم " شفت الشهيد جوا بيغني مواله ؟ - دندن معايا - الغُنا هو اللي باقيلنا خبيني يا امّا من رصاص القوم لا تبكي يا امّا دا قدر مقسوم شلت الحمامة في قلبي قتلوها هي ما خانت حد هما اللي خانوها بَكِّتْ عليها الحجر و الدمع كان شلال و انا حيلتي ايه غير حمامة و الوطن أندال لازم تطير يا حمام و تحارب الغربان لا تبتئس أبدًا مهما الرصاص طالك نار الرصاص اهون من تنكيسك راسك طير يا حمام و إعلى و استنى فجر اليوم لو سبت حقك يروح هينوح كمان البوم ** حاسس كأني مش بعيش لكن فيه شخص عايش بس مش نفسي صامت و قلبي بيبكي مـ الأحزان معرفش مين خاين و مين متخان قررت افوت الدنيا حواليا و أهجر وطن .. و أغيب عن الإنسان أنا كنت مدمن شعر و لكِّني قررت أسيب الورقة و الأشعار طبطَب عليا و قال : - لو كنت مدمن شعر صدقني يكفيك تشوفه - - مضاد للـطلقات - يكفيك تشوف الليل - بيعري أحزانه ... - يكفيك تشوف الوطن - جوا القصيدة - عشان - برا ملهش مكان - إلا لضباطه - الحب - والمواويل - و الغنوة - و الأفراح - و التوهه فـ مكانّا - كل اللي فات و اكتر بالشعر - نبنيها - فـ بلاش تسيب القول - و تفوتني وحداني - لو يوم يخاف القلم ... شوفلك صديق تاني - وتركني يومها و قام .... قبل الختام ... جالي الإله و حكيتله عن أسرار هو ميعرفهاش !