دخول
تسجيلغزل
Feb 16, 2025 01:46 PM Feb 16, 2025 01:46 PM
غزل بالشعر الشعبى السوداني يا أجمل صورة دنيا عشقت الدنيا عشانو وصحيح إنك مجافينا ونسيت ريدنا وأزمانو ونسيت قلبا في ريدك أهداك أجمل أوزانو **** إن تقسا علينا نحبك ونقول آسرنا حنانو وبخادع نفسى وحاتك خايفين من قولة خانو خايفين تقطع لصلاتنا نجتر من كان وكانو **** ومين عارف الدنيا تغيّر في يوم فكرو وأشجانو ويعود ويصالح ريدا يلقاه في نفس مكانو ياليت الدنيا تطفّي بعد الهجران بركانو **** يا أجمل ريد في قلوبنا ما اختل في يوم ميزانو ما هو لإخلاص ومعزة والشوق كترت ألوانو ارحم قلبا ما اتغيّر وتعال بدد أحزانو **** بعشق فى شخصك والله قسوة ورقة وإنسانو وعيون تركت أفكاري تسرح في عميق وجدانو تتخيل إنك قاسي وتتخيل برضو حنانو **** ذكراك أجمل ما فينا شعري ومعانيه وأوزانو إن تبعد برضك غالى وعزيز في قلب الصانو تعال وتعال لو مرة نعيد الحب وأركانو
الكاتب: حسن الأفندي
0المفضلة
14 المشاهدات
0 تعليقات