صادفتك و هذي اول مره اصادف ملاك نازل من السماء، أنتِ حقيقة و لا خيال انرسم بعقلي؟ كيف الكمال يعتريك دون تردد؟ و أنا كيف كنت عايش ثانيه دونك؟ تساؤلات مالها نهايه بدايتها وين كنتي من زمان؟ و وسطها أبيك لنهاية عمري و اخرها بدونك ما ابيني أنا معك إنسان حقيقي، واقعي، و مو خايف من إني اكون أنا كأن ربي يجازيني على كل خير بحياتي لمن جابك لي إبتسامتك تعطيني طاقة و حافز إني أعيش أنتِ مثل الغيمة لمن تمطر على أرض جافة و تعطيها حياة جميلة كل لحظة معاك جنة بمُجرد ما المس ايدك احس العالم يوقف كنت ادور على روح نفس روحك و ضعت مليون مره، تشتت قلبي و كان بأماكن سيئة بس عندك فقط عرف المكان الصح و ارتاح لأنك أنتِ أنتِ بكل بساطة بحياه ثانيه راح ارد اختارك مليون مره على زاوية المكان شفتك كنتي بروحك، حزينه على نفسك لمحتك و كأني لمحت شيء اعرفه من زمان شيء كان ضايع مني او مألوف لي شيء لي وحدي و هنا ابتدت القصة كنتي و لا زلتي شيء ما ينوصف لأنك كنتي بكل تأكيد بَلسم لجروحي و فرحه لي كنتي أنتِ بعفويتك و هذا اللي أحبه في بداية كل يوم يزيد حَماسي لأني راح اصادفك و على نهاية اليوم أنا غَارق في خيالي عنك أنتِ الوردة اللي مستحيل تذبل بيوم و لو صار و ذبلت بكون معاها لأني ادري هالوردة بالذات جميله بكل الحالات ما تتعب و أنت تشوفها و لها اثر كبير حولك الوردة هذي ناعمة غير عن كل الورود اللي فيها شوك ما تأذي و ريحتها عطر الندى وردة لونها أحمر تذكرك أن الأحمر يرمز لعاطفة كبيره بقلبك و ان الحُب دائمًا موجود الحُب اللي تحتاجه من زمان هادئ، سعيد، مُريح، جميل، دافي، مُشرق هذا كله إحساسي معك و شلون قادره بكل بساطه ترسمين الغيم الأبيض على لوحتي ؟ الغيم اللي كله خير، اللي قادر يبعد الذبول عن الأشياء الميته ! أنتِ القصة الصحيحة في الوقت الصحيح و التوقيت المناسب.