‏ياللي معك البال يروق ‏مايشبهك ايّة مخلوق . . ! ‏لا في ارض ولا في جنه ‏لا في عرس و لا في سوق . . ! ‏خصلاتك للصبح الطالع ‏ شريان و للشمس عروق . . ! ‏شعرك هبهب مسك وعنبر ‏و ورد الطائف والرقروق . . ! ‏و وجهك يقطر نور وخشمك ‏(فقّاري) قصّاص حقوق ‏وشفاك اخر شمس المغرب ‏حمرا والبسمات بروق . . ! ‏شكلك مخلوقة من سكر ‏وغيرك من سكر محروق! ‏احلى شامة شامة خدك ‏حبة فلفل مو مدقوق! ‏وش معنى غرنوق اجهلها ‏ومع ذلك انتي غرنوق! ‏ممسوسة شي ومنتوقة ‏شيين و شيٍ ممشوق! ‏ ‏كم حاجه عندك مضبوبه ‏وكم شيٍ عندك مفهوق . . ! ‏فيك عذوق بليا تمر ‏وفيك التمر بليا عذوق . . ! ‏محدٍ خانق خصرك بيده ‏لحاله خصرك مخنوق . . ! ‏فيه يلوق التوب الابيض ‏حتى الاسود فيه يلوق . . ! ‏واللي لا وقفتي وقف ‏لا رحتي يلحقك لحوق . . ! ‏معجونه صح ومصبوبه ‏ومنحوته من تحت لفوق . . ! ‏معذور اللي خايف منّك ‏الواثق ياكل خازوق . . ! ‏لا جاك اللي شايف نفسه ‏حطيتي برقبته طوق . . ! ‏ولاجاك المتواضع تخضع ‏نفسك لو يسوقك سوق . . ! ‏وانا لاهذا ولا هذا ‏انا العاشق والمعشوق . . ! ‏يتحرك ويّاك احساسي ‏و احساسي دونك طابوق . . ! ‏كلّي ذوق اني احبك ‏وانتي كلك كلك ذوق! ‏انتي كلمه مو موجوده ‏وانتي حرفٍ مو منطوق . . ! ‏ وانتي عيني وانتي روحي ‏وانتي قلبي و المعلوق . . ! ‏قولي لك مشتاقه جدا ‏قولي لي قلبك مسروق . . ! ‏لا قلتي لي ياخي وينك ‏اركض لك ركض المطفوق . . ! ‏وان قلتي لي قرّب . . جيتك ‏متناثر كني مصلوق . . ! ‏مايقبل هذا الطرق اسمك ‏لو ادري ماهو مطروق . . ! ‏لكن بكسر شطر لعينك ‏يا سما ذابحني الشوق . . ! ‏متولع بك كني شايب ‏متولع في حب النوق . . ! ‏كل كنوز العالم فالصو ‏ولحاله كنزك موثوق . . ! الصندوق السحري عندك ‏وعندي مفتاح الصندوق . . ! ‏ الصندوق السحري قلبك ‏وحبي مفتاح الصندوق . . !