دخول
تسجيلالملهمة ..!
Aug 1, 2026 10:54 PM Aug 1, 2026 10:54 PM
واذكر اني.. كنت اطيّرلك من اشواقي حمام.. يحمل اغصان السّلام.. وانت ماتدري بأني كِنت أزْهِر.. داخل شْعوري : أحبك .. واكْتِمْ احساسي لك بْصدري تِبَعْثَرْ.. كنت اغنّيلك فِكِلْ ليلة : ( دِلِلّو يالْوَلَدْ يـ ابْني دِلِلّو )… لين تِتثاوب على صوتي .. تَنام! وانت تَسْهِرني .. وتكْسرني ..وتِقْسى !! يعني ماتدري ..بأنّي مُرْهَفَة.. كسري حرام 🕊🕊🕊🕊🕊 انت ماتدري بأنيّ كِنت أبكي.. واحضن احزاني وافضفِض للوسادة.. عن قساوة قلبك اللي مارحمني. كنت أرفض.. إنّك تْقَيِّد حُضوري في قصيدة.. لاجل تَكتبْ .. لاجل تَعبث بالمشاعر.. تَحْصِد التّصفيق وانا ( الْمُلْهِمة )..اللّي يِنْكِسِرْ لي ألف خاطر.. يمكن يقولون ( شاعر )..! كنت وحدي أنزوي في هامش شْْعورك.. سراب.. كنت أمْطِرْ .. لكن احساسك جفاف .. كنت احاول أشعل احساسي شموع.. كنت احاول وانت تطفيني ظلام! 🕊🕊🕊🕊🕊 واذكر اني .. يوم وارَبْت الحُضور.. جيتني تِتْناثَر بْصدري شُعور.. كنت "غَضَّة" .. قلبي ابيض.. كنت طفلة تبتسم لك .. وانت تعطيها اهتمامك .. تَحْسِبَهْ لعبة تخاف انْها تضيع..! كنت في صدري رِبيع .. كنت أتْوَسَّدْ غَمامك.. مثل ريح.. كنتِ لي اشْيا جميلة قبل لاتصبح خريف.. و)تَصْفِر اوراقي وْتِطيح).. (و)تَكْسِر اغْصاني..وْتِمَوِّتْ كِلْ عصافيري.. وكنت اناديلك.. أناديلك.. أنادي.. لين بحّ الصوت في فمّ الكلام..! يونيو 2023
الكاتب: نوف الناصر
0المفضلة
20 المشاهدات
0 تعليقات