‏شفت الجنون اللي يُسَمّى (كتابة)!! ‏يعني مساحة معشبه بالدفاتر 
‏بعض الكتابة موغلة في الكآبة ‏والبعض احساسٍ ملوّن وماطر 
‏الظن خان بْـ حرفها لين خابه ‏بس المهم إنه تجسّد خناجر 
‏لاجه يعيد الما لوجهٍ ظما به ‏تشكّلت غيمة ظما في الحناجر 
‏بين الشبابيك الحزينة و بابه ‏أَسْدِلْ ستاير وارجع افتح ستاير 
‏أدري الجهات اربع ولكن غدا به ‏للخامسة .. بين البكا والمحاجر 
‏عجزت اسولف للقلم بعضِ ما به ‏لاينكسر في دمعتينه خواطر 
‏عجزت الملم للسؤال .. الإجابة ‏يمكن خواء ويمكن الدرب قاصر 
‏مدري الملامح باهتة أو تشابه ‏عجزت اميّز بينهم وجه سافر 
‏بين الورق تورق تفاصيل غابة ‏بين السطر جفّت عيون المحابر 
‏مابين إيماءة قلم واغترابه ‏تولد مشاعرنا أو يموت شاعر 
‏مابين خصر الما وخصر السحابة ‏عشب المسافة في جفاف المشاعر 
‏مابين طيش احلامنا والرتابة ‏وجهٍ تذكّرني و وجهٍ مسافر 
‏مابين تلويحة مساي وغيابه ‏فجرٍ يهز النور و يْموت باكر 
‏مابين حد الناي / حد الربابة ‏جرّيت صوتك يالألم لحن فاخر 
‏بين (ارتباك) النص .. بين ارتكابه ‏كوني غوايه لـ ( الشِّعِرْ ).. واتناثَر 
‏إمحي ملامح خيبتك في كتابه ‏مابين حرف المغفرة /حرف كافر 
‏تولّمي دام السوالف صبابة ‏تبخّري دام الضلوع .. المباخر 
‏كوني الجنون اللي يُسَمّى (كتابه) ‏أو لا تكوني .. أدري الحظ عاثر ‏• ‏• ‏⁧‫‬⁩ ‏من ⁧ الأرشيف