مدخل: إلى صديق الشعر الذي تاه في زحام الغربة اللعينة / عالقة بين احتمالات الكتابة والقراءة والقصايد والقوافي أستشف من الحزن بعض الكآبة يمكن اكتب بالتفاصيل اعترافي سالت اشعاري من عيون السحابة والمشاعر لبّستها ثوب ضافي ضايقه ما بين حزني والرتابة والشعور اللي تمادى في جفافي اختنقت احتاج لشوية رحابة مقدر اتنفس بهذا الضيق / كافي كنت ادور للسؤال أصدق اجابة ضاعت اجوبتي على أعتاب قافي كيف ذكّرني ..وكيف اليوم جابه؟! الحنين اللي بصدري كان غافي ضاع عمري ألتمس عذر لغيابه وانتظرته لين ضاقت بي مرافي آه .. لو يدري بقلبي و اكتئابه كان ماغادر ولا ودّع ضفافي لو يشّـرع للشتا والبـرد بـابه بشعل ضلوعي واغطّيه بْشغافي غارقة بين القصايد في كتابه آتلمّس بالورق إحساس دافي يا الصديق .. اللي تعثّر باغترابه هاك روحي لك وطن ماهو منافي يا الصديق .. الغارق بْـ لجّة عذابه أدري انّ الشّوك دربك وانت حافي أشعر ان احزاننا حــــــــيل تّشابه هات بعض احزانك لْصدري ..عوافي ياصديق العمر .. يا لون السحابة يا صديقي يوم كان القلب صافي ١ اكتوبر ٢٠٢٣