توطئة/ عام مر ومازال فستاني الأخضر مختنقاً في خزانة .. ربما حان الوقت للتخلص منه قبل أن أُطفئ شمعتي ..🕯️ • تعالي شويْ ! تعالي ننْدَه الدنيا تِفرّحنا.. قبل لا شمسها تربك ملامحنا.. تلوّحنا ! وتتركنا على مفرق هجير وْ .. فيْ ! ……….🌿 تـعالي نرسـم البسـمة على شفاه الظما والما ونسرق من ( هنا ) حلمه نخـبّيه بـْ ( هناك ) وْ مـا نــدوّر للعــذر كلـمة لأن اعـذارنا بـكما ..! ……….🌿 بقولك شي !! تعرفين المسا لا شقّق ثْياب النهار الممتلي بالضيْ !! يهندم من ظلامه سهرتين وْ .. روح.. يغيّبها عتيم بوحشة الوِحدة.. وتتوارى ورا جدرانها ( وَحده ).. تغني… صوتها مبحوح.. وتتهندم .. وتلبس من حنين .. جروح وتتكبّر .. على فستانها الاخضر.. وترميه فـْ بساتينه .. ولا تندم ويتماهى مع العشْب بعيونه .. غيْ ! ……….🌿 تعالي شويْ ! نبدّد فـ الضّيا عتمـة! ونشعل آخـر الظـلما نتوه … وْ نمتلي زحمة وجيه..وْذاكرة..واسما ••••• تعالي شويْ ! ندوّر للعطش عذر السحابة وارتباك الميْ ! تعالي علّقي صوتك على مشجب شعوري.. " وغنيلي شِوي شْوي " " خذي عينيْ " وشـوفيني مثل نجـمة تقودك والطريق اعمى عشان اشعر بأني حيْ ! ١٨ يونيو ٢٠٢٤